بارسه كيلمس

شهريده گي كتته مكتب يانديريلدي.كيچيك مكتبلرنينگ هم كولي كؤككه ساوريلدي.برچه نينگ يوزيگه اؤقيش ايشيكلري تقه-تق ياپيلدي.بوكونلر دن قاچگنلر قاچدي؛قاچه آلمه گنلر توبه لر قيليشيب،مسجدلردن اؤزلر يگه باش پناه إيزلشلريگه تؤغري كيلدي.شوندن كيئين سؤراق-جواب كونلري باشله نيب،قيپ-قيزيل قيامت قؤپتدي شهريميز ده.اولر مكتب اؤقيگنلردن اوشله گنلريني آته-آنه لري نينگ بغريده بؤلسين سوغوريب آليب،گمدان قيله بيرديلر.قيز باله لراؤز اويلريده قه مب قؤئيلدي.هه!چيندن هم قيامت.مكتب كؤرگنلر ايندي اولرآلديده حساب بيريشلري شرط. اؤقيگنليك كيچيريلمس گناهگه تينگ بؤليب قالدي.آته-آنه لرنينگ الداو،يوپه تيشلريگه قره مي،مكتب باله لري كيچه لري قؤرققه نيدن الخسيره ب،بقيريب،الجيره يلب چيقه ياتگن كونلرايدي.همّه اؤز خياليده قاره محكمه بورياسيده تيز چؤكيب،ير تيشلب،تال برگيديك تينيمسيز تيتره ياتگن آنلر.بير ياقده ديوار بيتيده تيمير تنگه لر سالينگن شلاقلر آسيغليق توريبتي.باشقه قين-پانه،زنجير،زولانه ساووق و اؤته قؤرقينچلي صلابت تؤكيب تورماقده ايدي.اولرنينگ توتقينيده توريش سهل كم اؤليم ديمكدير.برچه نينگ اؤي-انديشه سيده شونده ي خياللر حكمران. انسان باله سي توشيده كؤرگنلريني اؤزيگه إيشانقيره مي،«كيچه لري كؤرگنلريم كاشكي توش بؤلسه يدي»ديب چيقه دي كيشي.انسان تقديري سيرپه ئگن آق و قاره ساقللر قؤليده...

"اولر يره تگندن بويروق كيلتيرگن؛پروردگار يالغيز انه اؤشه لرني يارله قه گنديك گويا.تنگري اؤز حكميني همّه بيرده ي عيان قيلگنيده آدمزادنينگ تشويشي آزراق بؤلرميدي. همّه عيب اؤزيده"-ديدي كؤپچيليك. 

اؤقيشي چله قاليب كيتگن جوره قول اؤشه لرنينگ قؤليدن زؤرغه قوتيليب آلدي. مچيتگه تيز- تيز باريب توريشي جانيگه آره كيردي شيكيللي،عمل- تقل قيليب بؤلسين اؤز قيشلاغيده،بوياغي يشب كيتيشيگه كؤزي يتدي.حيات معناسي اريب،تاتي كيتگن ايسه-ده،شو كونگه مجبور كؤنگن بؤلدي او.

جوره قول إيككي هفته دن كيئين اؤن تؤققيزگه كيره دي.إيشچنگينه باله،چپه قي، قاره مغز،بؤيي ناوچه دن كيلگن؛لبلريني ايندي قاره مه ين توكلر باسه باشله گن، بيراق،يوزلريگه هلي اوستره تيگمه گن.آوازي يؤغانله شيب،كيكيرته گي بؤرتيب چيققن؛كؤزلري شيشه ديك تينيق،قويققينه قاشلريگه كؤچه چنگلري انچه گينه آره له گن.مكتبده گي تازه ليك و آزاده ليك اوني ترك ايتگن.اؤزي إيسته مه گن بولغاق حياتگه تن بيرشگه ناچار.بيش وقت مچيتده كؤرينسه بؤلدي،بو دنياده باشقه آرتيقچه تشويشي قالمه گنديك گويا.ايگيليب،بوكيليب،منگله يني يرگه اورسه بؤلدي؛شونينگ اؤزي كتته "كمالات"ايكنيني شونده توشونيب ايتدي.بونرسه لر الله گه نيمه اوچون كيره كليگيگه عقلي يتمسدي.توبنليكده هم فضيلت بار ديگن فضيلتدن بي خبر ايدي جوره قول.

آرديني اوخو
گؤنده ر     بؤلوم لر: