هر كون كؤزي آلديده دنيا بير خيل،تكراري و بي معنا بؤليب،كؤريندي.اوزاق- يقينگه جيله ي ديسه قؤلي هم كؤزي يتمه يدي.قيشلاغيده إيپسيز قازيققه باغليق او.يرمك ايمس معنالي راق نرسه لر تامان إينتيله دي؛اولر سري تلپينه دي.

جوره قول يشب تورگن قيشلاقده گي كتته يؤل ياققه سيده،بيش-آلتي ياشر توت درخت كؤرك ساليب كؤكريب توره ردي. بير سفه ني ياپگوديك كولنكه سي بار ايدي  بو درخت نينگ.جوره قول بؤش وقتلريده انه شو درختگه كيليب،نوده لري آستيده،اؤيگه تاله دي.عمري نينگ اؤته ياتگن لحظه لريني سر حساب قيليشگه كيرشه دي. تؤغري،درخت اونچه ليك كيكسه و دنيا كؤرگن ايمس،هر قه لي اؤزيگه تينگداش بير درخت-ده.انه شو توت درخت بيلن سيرلشه باشله يدي او.قره سه كي،شوگينه درخت جوره قولنينگ ديگنلريني ايشيتيب،درديني آله يپتدي.اونگه بار مهريني قؤيه دي.درختگه ائتگنلري گويا آلتين دفترده يازيب قؤئيلگنگه اؤخشب تويله دي.

بيردن خيالي آغيب درخت يپراقلريني سنه ياتگنده ي كؤزلري تيپه گه تيكيليب قالدي. قره سه كي،درخت نينگ شاخه لريدن ائريم-ائريم برگلري آره -سيره سرغــيه باشله گن.هر كوني قوياش باتيشدن آلدين شو يرگه كيليب،بير قاره سيني كؤرسه ته دي. كون اؤتيب بارگن سري درخت نينگ سرغيگن يپراقلري آرتيب باره ر ايدي.اؤيلشگه توشتدي جوره قول اؤزيچه :  

 - ياپيريم ايي!كوز ايمس-كو،نيگه بو درخت نينگ برگلري سرغه يب توشه باشله ياتير؟ نيمه دن ايكن بو سرغه يشلر؟ياكي مينينگ باشيمگه توشگن سودالر اونينينگ هم ياقه سيدن آلگنمي ايكن؟- ديدي آسمانگه قره ب او.

هر بير اوزيليب توشه ياتگن برگ قاره كؤز صنفداشلريدن بيريني ايسيگه ساله دي. بير كون باريب بوتون درخت سرغه يب،قاوجيره ب،قوريب تؤكيلسه بارمي؟ او انه شو كوندن اؤته اضطرابده ايدي.

جوره قول اوئيگه باريب كؤپدن بيري قاتيب ياتگن كراوت ميچه ني سووگه إيبيتيب قؤيدي.بير كؤزه سوو آله ياتگن ميشچه ني قؤلتيقلب،بلاق باشيگه آليب باردي.و قئنب تورگن بولاق قيرغاغيده قيميرله ياتگن اوچ-تؤرتته شوليك(زوليك)ني هاوچيگه آليب، قوم اوستيگه إيرغيتيب آتدي.كراوت ميشچه ني سوودن تؤلديرديب،تؤغري آليب كيليب توت درخت تنه سيگه قوئيدي.و«آب حياتدن يخشيلب،تؤئيب،سيميريب إيچ جانيم!سيني اؤزيم هلاكتدن قوتقره من»- ديدي توت درختگه قره ب او.

جوره قول نينگ بيتاب درختگه قره ته ائتماقچي بؤلگن:«هلي سينينگ شيرمان توتينگدن كؤپلب آدملر تاتيگي؛سلقين سايه نگدن راحتلر آلگي؛حتاكي،قورت- قومورسقه،قوشلرگه-ده يگوليك بيرگي سن،رزق اولشكي سن،ديگن گپلريني إيچيده ائتگن بؤلدي.و درختگه سوو بيريشدن تالمي،إيشيگه دوام بيره ويردي.شوند كئين توت درختگه جان كيريب،يپراقلر يوزيگه سوو يوگوره باشله دي.جوره قول بير خيرلي إيش قيلگنيدن اينگيل تارتيب،روحي تازه بؤلدي.

2

جوره قول كيچه لري آته-آنه سينينگ بغريده،عايله ده تين آلردي. بيري-بيريگه قوّت و باش پناه بؤليب توريبتدي عايله اعضالري.ليكين،اوي باشيدن قؤرقو و قوتغو اريگنيچه يؤق.اولر بير كار-حال بؤليب قاليشيدن دايم خواطرده .

شو تاپ آسمانده تؤلين آي ياغدو تره تيب توريبتدي.سما يوزلدوزلري آليس-آليسلردن إيلتيللب كؤر ينه دي.چيكسيز كاينات كيمه سيده بوتون جان ذات سفرگه چيققنديك. مجال بيريشسه تون نينگ آسايشته ليگيدن ميريقيب،دم آليشگه نيمه يتسين.تون آدمني شاعر ياكي فيسوفگه ائلنتيريب قؤيركن.يخشي،اؤي و چقور مشاهيده لر تونلري مييه گه اوريلركن.كيچه ده فضيلبت كؤپ.ايركك-عيال تونلري جفتله شيشگه بير-بيرينينگ قؤينيدن راحت-فراغت آليشگه إينتيله دي.

حاوليده چيراق ياقيشگه احتياج يؤق.ساعت اؤن إيككيگه يقنلشماقده ايدي. بيردن إيت نينگ هكيللب،غبشيب هورشي باشلندي.بؤينيدن بايلنگن إيت،قنده ي دير يات تاووشلرني سيزيب،كوچليرارق هوريشگه توشدي.اونگچه إيلكه سيده كلاشنيكوف آسيب آلكن إيكّي آدم حاوليگه تؤغري كيريب كيليشدي.طوطي عمّه و يخشي باي اكه بيزاوته له نيب اورينلريدن توريشدي و :

-كيم بو،نيمه إيشلريز بار ايدي يريم كيچه سي؟-ديب سوره شدي تونگي مهمانلر دن.

- بيز،- ديدي تاماغيني سيكينگينه قاققن تونگي آدملردن بيري،-خيريت،بيز بيرينچيدن سيزلردن خبر آلگني كيلدي.إيككينچيدن اؤغلينگيز جوره قولگه ائته ديغان گپيميز بار ايدي.

- نيمه إيشيز بار ايدي؟- طوطي عمّه باشيده گي قرسيني پيشانه سيگه تاردي،-اوخله يپتي بالم.كوندوزي كيلسه يلر بومس ميدي.مكتب اؤقيگن بؤسه يم كافر بؤلگني يؤق.عقللي،ايسلي باله ام.هيچ كيم اوندن آزار كؤرمه گن.

- شونده ي قيلسك هم بؤلردي-يو،گپيميز مهم،خلوتده گپله شيب آلگنيميز يخيشيراق ديب اؤيله ديك،- ديدي آغزيني قاره سلله بيلن اؤره ب آلكن كيشي.

طوطي عمّه باره ساليب اؤغلي جؤره قولني سيكين ته ته لب اويغاتدي.جوره قول اويقو سيره ب،جاييدن سكره ب توردي.آنه سي نينگ بؤينيدن قوچاقلب آليب،ينه كؤرپه سيگه كيردي.آنه سي اؤغيلني قؤلتيقلب چارلنمه گن تونگي مهمانلر آلديدگه آليب كيلدي.جوره قول كؤزلري تؤله اويقو  بير حالده تونگي مهمانلرگه :

- سلام،ديدي و چؤكه له توشدي.

تونگي مهمانلر آيتلر اؤقيب،دعا وصلوات ائتيشدي.و بيردن مقصدگه كؤچديلر:

- الله نينگ امريني بجا قيليشگه درگاهينگيزگه كيلديك يخشي باي اكه ؛عالم و علمالريميز جهاد و اورشلرده هلاك بؤليب بارماقده لر.اولرنينگ إيزداشلريني تيارلش بيز اوچون هم فرض هم قرض.نصيب ايتسه الله عنايتي إيله اؤغلينگيز جوره قول يقين وقتلرده كتته دين عالمي- مولوي بؤليب،اؤز قيشلاغيگه قئته جك.

- يؤق،يؤق!مين باله مني اؤز قؤنيمدن،يانيمدن نريگه جيليشگه رخصت بيرمي من،- ديدي طوطي عمّه.بوگپگه آته سي هم قرشيليك قيلدي.بؤز باله ني قنده ي قيليب يريم كيچه سي مين نا ته نيش آدملرگه تاپشيره من.انصف قيليب بير اؤيلب كؤرينگ قني تؤغري إيش ميكن؛شو قيله ديگن إيشلريز؟

- دادو وايلرينگ فايده قيلمه يدي.مسلمان بنده سي الـله يؤليده هرنرسه گه تيار بؤلماغي كيره ك.بيزنينگ بويروغيميزدن بؤين تاولش عين شرك،الله قرشي چيقيش و ير يوزيده فسادقيليش بيلن تينگدير،- جؤره قول نينگ قؤللريدن اوشلب،يؤلگه باشله دي،- گپ تمام والسلام.

بو وضعيتدن چيغه بيران بؤلگن طوطي آپه جوره قولنينينگ بؤينيدن قوچگنچه،بغريگه باسيب،أيغلب-أيغلب يوزو كؤزيدن اؤپيشگه توشدي.تقديرينگ شولر قؤليده ايكن«آي باريب آمان قئت باله ام!»-ديه اؤغليگه إيليشيب،دروازه گچه باردي و بؤينيده گي بؤري آشيغيني يچيب اونينگ بؤينيگه آسدي.شو بؤري آشيغيني طؤطي عمّه جوره قول توغيلگنيده سوخدن،يامان كؤزلردن اسره سين معناسيده اؤغلي نينگ چقه لاقليك پئيتيده بيشيگيگه آسيب قؤئيگندي.منزلگه يتيب آلگندن كيئين جوره قول انه شو بؤري آشيغيني"مين تيريكمن"رمزي معناسيده آنه سيگه قئتيب يوباريشي كيره كك ايدي.عين پئتده بؤري آشيغي آنه اوچون منگو ساغينچ بيلگيسي ايدي.جؤره قول آنه سينينگ كؤكسيگه باشيني قؤئيب،«آق سوتينگيزگه راضي بؤلينگ آنه جان!»-ديب شو جايده خيرلشدي.

3

جؤره قل بيلن اوچاولان يؤل يورسه هم مؤل يوريب،ائتيلگن منزلگه يتيب آلديلر.اولر يتيب ير اصليده،پاكستانده گي مجاهد تيارله ياتگن مكان ايدي.اوزون آق كؤيلك كيئگن باله لر ملالر آلديده تيز چؤكيب،باشيلريني يؤقاري-قويي سيلكيتگنچه درس اؤقيماقده ايديلر.عربچه سؤزلرني بيديرله شيب،اؤقياتگنديلر.جوره قو هم ايسكي طلبه لر آره سيگه چؤكتدي.

- قي يردن كيلدينگيز برادر؟-ديب سؤره دي طلبه لردن بيري.

- اؤز خاليمگه قؤئيشمي،ميني توركستاندن آليب كيلشتدي،-جواب قيلدي جوره قول خفه بير كؤرينيشده.

مدرّسلردن بيري جؤره قولننينگ قؤليدن اوشلب،طلبه باله لر ياني بير صفده ير  لشتير دي.درسخانه گه كتته آخوند كيريب كيلركن،طلبه لر بير آوازدن صلوات ائتيشدي.آخوند اؤقووچيلر حضوريده جؤره قولني تؤخته تيب ته نيشتيردي :

- بو باله بو گوندن باشلب،الله يؤليده جاهد قيلگني سيزنينگ قطارينگيزگه قؤشيلدي. جؤره قول قرآنگه آنت إيچيب،شهادت بيلباغيني كمريگه باغلشگه تيار.قاره بيلباغني بيليگه باغله يدي و كفارگه قرشي جهاد قيله دي!-ديدي او سؤزينينگ نينگ سؤنگگيده.

جوره قول يورتي نينگ رسم و رسوميني بجا كيلتيرگن بؤليب،آنه سي بؤينيگه آسكن إپك إيپلي بؤري آشيغيني كؤزيگه سورتيب اؤپيب قؤيدي.جوره قول نينگ بو حركتيده جدّي ناراضيليك آهنگي ياتگندي. بوني عربلر،آخوندلر حسابگه آلمي سؤزيده دوام بيردي.   

إيككنيچي مدرّس جهاد فضيلتلري بابيده نطق سؤزله دي:

-عزيز مجاهيدلر!سيز شهادت بيلباغيني ائتيلگن ترتيبده باغله نگيز.اعلاجي باريچه آياقلرينگيز آره سيده محافظت اوچون تيمير قلقان باغلب آليشيگيز واجبدير.شهيد كيتسنگيز،بهشتده سيزني حور و غلمانلر خوش قرشيله گيلر.باكره قيزلر آغوشيده سيز كؤنگول مراديگه يتب،عشق شربتيده سيراب بؤلگي سيز انشالله!بو الله نينگ سيزو بيزگه بيرگن وعده سيدير.  

شو يرده ديني سباق و عملي اوروش جوره قولگه هم اؤرگه تيله باشنلدي.اونگه جهاد ده هول و قوروق بيرده ي يانيشي الله نينگ حكمي،-ديه اوقتيريلدي.شونده ي تقديرگه گرفتار قيلينگن جؤره قول ناچار اوروشلرگه تونگي عملياتلرگه تارتيله باشله ندي.بو إيشلرگه عربلر و قؤشني مسلمان يورنلردن كيلگن مجاهيدلر باش- قاش بؤليب توريبتدي.بو جريانده وايه گه يتمه گن باله لرهم اوزاق-يقينلردن آليب كيلينه ياتگندي.مدرسه إيشيگيده«اؤلسه نگيز شهيد،اؤلديرسنگيز غازي!»-ديگن عرب تيليده گي يازوو آسيغليق توره ردي.اوروش و پارتله تيشلر قيليب اؤليب كيتگن أيگيتلر،باله لر اؤرني ينگي-ينگي مجاهيدلرحسابيگه تؤلديريلماقده ايدي.جهاد شدت إيله دوام ايتتيريلماقده...    

4

جوره قول يؤليده اداي تمام بؤلگن طوطي عمّه تينمه ين كؤز ياشي قيلر،«بالم نينگ هيديني آليب كيلگنديرسن شمال»- ديب هواني تؤئيب-تؤئيب هيدلر ايدي.اؤغلي نينگ يؤليده كؤزلري قوريب قالگن آنه ي زار،باله گينه سي نينگ كيئيملريني پئي پسلب تونني- كونگه اولب چيقه دي.

آخري چال- كمپير جؤره قولنينگ درگيني إيزلب يؤلگه چيقه ياتگن بؤليشدي.طوطي عمّه اؤغليگه بير جوره كيئيم باش و إيككيته گينه پتير قيليب،«قيئده سن جگريم»-ديه يؤل باشله شدي.آته-آنه ائتيلگن منزلگه يتيب آلديلر.طوطي عمّه و يخشي باي اكه  مدرسه إيشيگيده توريب :

- جوره قول،ديب تاووشي يتگنچه قيچقيردي،-طوطي عمّه.هيچ كيمدن آواز چيقمس ايكن،اطرافده گي طالبلردن اؤغليني سؤره شگه توشدي.هيچ كيم جواب قيلمه دي. آخري كيمدور مدرسه دن تشقريگه چيقيب،بي پرواليك بيلن اولرگه اوغليدن«جؤره قول الله يؤليده شهيد كيتدي»-ديگن خبرني كيلتيردي.طالبه نينگ قؤليدن بؤري آشيغي قؤليگه آلركن طوطي عمّه اؤغليدن قالگن ايسده ليكني گؤزيگه سورتيب   شو يرنينگ جان بيردي.

گؤنده ر     بؤلوم لر: