اورمان

صحنه گئنيش بير يولدور. تاماشاچيلارين اؤنونده اولان دووار داشدان دوزه لميشدير و بير پوتوشقا دمير ميله لريله آز آرا ايله يئردن قويولموشدور. پوتوشقا داليندا بير ائو واردير. گؤزه ل بير اؤرتوك ائوين ايچيني تاماشاچيلارين گؤزوندن گيزله دير.

***

گنج بير كيشي صحنه يه گيرير. الينده قيرميزي گول دسته سي وار. ياواش – ياواش بارماقلاري اوسته قاباغا گلير، گؤزونون بوجاغيله پنجره يه باخير، اؤرتويو گؤرور، امين عئيني حالدا ناراحاند پنجره نين اؤنوندن كئچير، دايانيب فيكره دالير. چئوره سينه باخير. دؤنوب يئنه پنجره اؤنوندن كئچير. دايانيب قولاق آسير. دؤنور و پنجره اؤنونده دايانير و قولاق آسير. اؤسگورور و قولاق آسير، نئچه آن اؤزونو ايتيرميش پنجره قاباغيندا آدديم آتير، پنجره يانيندا دايانير و قولاق آسير. بير ياخينلاشان توپلومون هاي باشاراغي قولاغا چاتير.

كيشي باشي داليني باخير، گليب پنجره اؤنونده دايانير، اوجا سسله اؤسگورور، اوتاغين ايچيني گؤزدن كئچيرير. هاي باساراق ياخينلاشير. كيشي توپلوما ساري باخير و گوللريله پنجره نين شوشه سينه چالير. توپلومون هاي باساراغي داها ياخينلاشير. كيشي بارماقلاري اوسته قالخيب پنجره سينه شوشه سينه وورور، دال – دالي گئديب صحنه نين اؤنونه گلير، بلكه اوتاغين ايچيني ياخشي راق گؤرسون. توپلوم صحنه يه گيريب چيغيريرلار :"هورا!".

كيشي ايستير پنجره يه ساري گئتسين، آنجاق توپلوم قاباغا گليب صحنه ني دولدورورلار و چيغيريرلار :"هورا!". و دايانيرلار. هاميسي جيددي و قورخولو قيليقلاري واردير. قاباغا باخيرلار. تكجه گنج كيشي پنجره يه دقت يئتيرير. هامي سوسورلار. توپلومون قارشيندان اوجا سيگنال سسي قالخير. خالق چيغيريرلار :"هورا!:. گنج كيشي باش اوزالدير بلكه پنجره داليني ياخشي گؤرسون. سيگنال سسي اوجالاراق ائشيديلير، خالق حيرصلي قيليقلارلا يومروقلارين قالديريب چيغيريرلار :"هورا!". گنج كيشي پنجره يه ساري چيغيرير :"آهاي!". هامي سوسور. آلچاق بوي بير كيشي الينده بير چارپايا خالقين اؤن سيراسيندا تاپيلير. چارپاياني يئره قويور و اوستونه چيخير؛، گؤزلويونو بورنونون اوستونه قويوب، دقتله توپلوموسئير ائدير.

خالق حركتسيز دايانيبلار. نئچه آن سوسقونلوقلا كئچير، كيشي چارپايا اوستونده يومروغونو قالديرير و اوجل سسله چيغيرير :"هورا، هورا!". چارپايادان ائنير. خالق چيغيريرلار :"هورا!".

گنج كيشي چارپايا اوستونه گئدير، گول دسته سيني كؤكسونه سيخاراق پنجره يه بره لير. سونرا گوللري پنجره يه ساري آتير. گوللر داغيلير. خالق اونو چارپايادان آشاغي چكيرلر و اوز به اوزه بره ليرلر. اوجا دانيشاندان دوشونمز بير سؤزجوكلر قالخاراق توپلومون قارشيندان ائشيديلير. خالق ناراضي قيليقلاري واردير. ايشيق يانيب – كئچير./ خالق چيغيريرلار :"هورا!".

گنج كيشي خالقين سيراسيني قيراغا ووروب پنجره يه ساري گئدير. خالق اونو سيرادان ائشيگه آتيرلار. اوجا دانشانين سسي حيرصلي آنيلماز سؤزجوكلري چئينه يير. خالق قولاق آسيرلار، گنج كيشي يئنه توپلومون سيراسينا گيرير. هوندور بير كيشي اونو توتوب ساخلايير، بير حالداكي اؤزو قابغا بره ليبدير. گنج كيشي چيغيرير :"آهاي!". اوجا دانيشانين سسي داها اوجالير. سيگنال سسي اوزاقدان ائشيديلير، توپلوم يئنه ياواشجا چيغيريرلار :"هورا، هورا!".

گنج كيشي اؤزونو هوندور كيشي نين اليندن قورتاريب صحنه نين اؤنونه گلير، پوتوشقايا باخير، اومودسوزلوقلا يئرده چومباتما وورور، باشيني ايكي الي آراسينا آلير. اوجا دانيشانين سس ساياغي قورخودوجو اولور، بير اينجه خانيم گولوشونون سسي توپلوم ايچيندن ائشيديلير. گنج كيشي تله سيك قالخيب قولاق آسير. قادين گولوشو بير ده ائشيديلير. گنج كيشي توپلوم سيراسينا گيرير. ايتي بير ايشيق يانير و كئچير. خالق باغيريرلار :"هورا، هورا، هورا!".

نئچه آن سوسقونلوقلا كئچير. خالق گؤزو يولدا و قورخهراق اوز به اوزه سوزورلر. بيردن گولله نين ياغمور سسي قالخير. توپلوم سئلي دؤنورلر، قورخموش قيلقلارلا قاچيرلار و صحنه ده ائشيگه چيخيرلار. گولله سسي و آدديملارين سسي بير زامانا قده ر ائشيديلير. صحنه بوشدور و توپلوم گنج كيشي ني ده اؤزويله آپارميشدير. ازيلميش گوللري كوچه نين داش دؤشورونده گؤرونور. نئچه آن كئچير، پنجره نين اؤرتويو قيراغا چكيلير و پنجره تله سيك آچيلير. گؤزه ل بير قيز، گؤزلريني اووكالاياراق تعجوبله كوچه يه و گؤيه باخير و فيكره دالير. سونرا توزون بير نفس آلير. بيردن يئرده ازيلميش گوللره دقت يئتيرير، اليني ميله لر آراسيندان گوللره ساري اوزالدير، الي چاتمير. بير قارقا سسي ياخيندان، دامدان اوجالير.

***