هاوالار تك اوره گيم دولغوندور

قورويان داغلارا ياغماق ديله يير

سئل اولوب ظاليم ائوين ييخماقا آخماق ديله يير

ايلديريم تك گئجه باغرين يارا شاخماق ديله يير

آچين آققيشقالاري!!!

منه يوخ......

قفس غمده قناريلره بير رحم ائله يين

بير گولون سولماسينا سولماميشام

قلبيمين دولماسينا دولماميشام

قورخورام توستو وورا گول خانامي

آچين آققيشقالاري

بير گوروم اولكه م آرا بيرلشن ائللر نئجه اولوب؟!

كوچه لرده يوموروق توسپورو بايراق اولان اللر نئجه اولوب؟!

بيزيم ائللر نئجه اولوب؟!

آچين آققيشقالاري

بو نه ائودير كي ايشيقليق يولو يوخدور!!!

بيلميره م قبله م هاياندير؟؟؟

ائويمين ساغ سولو يوخدور

بيريني بغض توتوبدور دانيشانمير

بيري بير شيردي دوشوب دار قفس ايچره، چاليشانمير

آنا ايستكلي بالايلان باريشانمير

ايكي تورپاق قاريشانمير

قول بويونلا ساريشانمير

آچين آققيشقالاري

ائله بيل كي قولاغا واي سسي گلدي

آنالار قالميش اوغولسوز

" اوغول اي واي !" سسي گلدي

دئيه سن هاي سسي گلدي

يا گورن قانلي بئشيك اوخشورو لاي-لاي سسي گلدي

قاپي تاختا-دالي سالغين

پاجا باغلي - سسيم آرغين

نه گئدير سس

نه چيخير هاي

اولدو كال كلمه لر اوسته امگيم زاي

واي ياساق ديللي ائليم واي

واي ياساق ديللي ائليم واي!

گؤنده ر     بؤلوم لر: تورك كيمليي