+ به يه ن
تيراختور، آذربايجان‌دير
يازان: حسين واحدي
دونيانين ان سئويملي ايدماني يوزده-يوز فوتبال‌دير. اويونلارين نتيجه‌لريني، چوخ واخت اؤنجه‌دن دئمك ايمكانسيزدير. بونا گؤره فوتبال‌دا هيجان، انرژي، كدر ايله سئوينج، 90 دقيقه تاماشاچي‌لار ايله ياشايير.
دونيادا بعضي تيم‌لر، اوبيري تيم‌لردن داها چوخ سئويليب، يانداش (طرفدار) صاحيبي اولوب‌لار. آنجاق بو آرادا، بيز آذربايجان‌لي‌لارا، بوتونلوكجه دئسه‌ك، ايران تورك‌لرينه، اؤز دوغما تيميميز، بوتون دونيا تيم‌لريندن، عزيز ايله سئويملي‌دير. بو تيم، "تيراختور"دور.
ايران‌دا ياشاييب، اؤزونو تورك بيلن هر كيمسه، تراختورا خاص بير سئوگي باغلاييب، اونو اوره‌گينده ياشادير. هئچ اولماسا، ائشيده‌نده، تيراختور، فيلان تيمي اودوبدور، سئوينيب، ترسينه ايسه نتيجه آلمايان‌دا راحاتسيز اولور. دئمك اولار تراختور بيزيم ياشاييشيميزدان آيريلماز بير قول اولوبدور.
آذربايجانين حق اولان ايستك‌لرين، آجي‌لارين، سئوينج‌لرين، تيراختور واسيطه‌سي ايله هامي‌يا بيلينديريريك. تيراختور، بيزه راديو-تلويزيون، آناديلي و دئيه‌سن بير يئتيري‌دير (رسانه دير).
بعضاً، كوچه باشاينداكي باققالا گئده‌نده، دئيير، فيلاني، تيراختورون اويونو نه زامان‌دير؟ و يا، ايش يئرينده، امكداشلاريم، فوتبال ايله آرالاري اولماسادا، تراختورون نتيجه‌لري اونلار اوچون مهم ساييلير، و نه گؤزل ائليميزي اؤزونه قايتاريب، بيزيم تيراختور! چوخلارين گؤرموشم؛ "تيراختور، بوتون آذربايجان‌لي‌لاريندير" دئييبلر. چوخلاريف ايش-گوجلرين، بيراخيب، تيراختور اوچون ايستي‌ده-سويوق‌دا استاديوما گئديب‌لر. آنجاق تيم‌لري نتيجه آلماسا‌دا "عيبي يوخ-عيبي يوخ" سسله‌ييب‌لر.
بعضي واختلار، بو عيبي يوخ‌لار، يوزلرجه، دانلاماق‌دان سؤز آچير، بونو اويونچولار ايله تراختور مسئول‌لاري بيليرسه!
بعضي‌لرينه بو ده‌يرلي تيم، آيري بير هدف ساييلسادا، آذربايجاني جان‌دان-اوره‌ك‌دن، سئونلر اوچون تيراختور سئوگي دير، ياشاييش‌دير، انرژي‌دير، گوج‌دور، حاق سسي‌دير، تيراختور، آذربايجان‌دير!
گؤنده ر
بؤلوم لر:
تورك كيمليي